Gang war sa Mandaue kalmado na - MCPO

CEBU, Philippines - Gikalipay sa mga opisyal sa Mandaue City Police Office (MCPO) nga minus na ang gang war sa dakbayan sa Mandaue.

 Kini ang giluwatang pamahayag ni MCPO Deputy Director for Operations P/Supt. James Goforth atol sa pakighinabi sa Banat news.

 Matud pa ni Supt. Goforth nga gumikan sa subsob nga pagpahigayon og checkpoint sa managlahing lugar sa dakbayan sa Mandaue hinungdan nga minus usab ang mga batan-on nga ilang nasikop nga nagdala og armas mobuto o mga mahait nga hinagiban.

Gipadayag ni Goforth nga ila nang nailhan ang mga lider sa mga gang sama sa Bloods ug Crips nga kanunay nagkabangi ug giplanohan nilang ila kining pakigtagboan alang sa kalinaw ug kahapsay sa matag grupo.

Sa milabay’ng mga bulan kusog ang krimen nga nahitabo nga mugna sa mga miyembro sa gang nga usahay makapagan og mga sibilyan sa ilang mga pinusilay.

 Gumikan niini base sa ulahing talaan sa kriminalidad sa dakbayan sa Mandaue nasuta nga minus na ang krimen nga adunay kalambigitan sa away sa mga gang. (BANAT NEWS)