Dalaga nadasmagan sa motor namatay

CEBU, Philippines - Patay ang 55 anyos nga tigulang dalaga samtang naangol usab ang drayber sa motorsiklo nga nakadasmag kaniya didto sa national highway sa Sityo Kalkalan barangay Poblacion lungsod sa San Remegio niadtong Biyernes sa alas 6:00 sa gabii.

Ang patay nang nadangat sa tambalanan mao si Clarita Pedrosa Capalac, 55 , dalaga nga taga San Remegio, samtang ang drayber sa motorsiklo mao si Robinson Jabato Bofill, 31, minyo, nga taga Sityo Bajada barangay Poblacion, sa maong lungsod.Si PO3 Jovanny Placencia sa San Remegio Police dihang nahinabi sa Banat News nagkanayon nga ang motorsiklo kansang drayber walay helmet gikan sa lungsod sa Bogo ug paingon unta sa Poblacion San Remegio.

Apan pag-abot sa maong lugar nga medyo dunay gikusgon, mao usay pagkanaug sa biktima sa habal- habal nga iyang gisakyan ug mideretso lang og lab ang sa karsada nga walay pupanagana.

Naatol nga maoy pag-agi sa motorsiklo niadtong higayona busa nadasmagan gyud ang biktima nga misangpot sa iyang kamatayon.

Gidala pa ang biktima ngadto sa Verallo District Hospital sa Bogo apan gideklarar sa doctor nga dead on arrival.

Samtang ang drayber sa motorsiklo anaa na karon sa prisohan sa kapolisan sa San Remegio. (BANAT NEWS)