Nang-hostage

CEBU, Philippines - Usa ka 34-anyos nga lalaki ang mi-hostage sa iyang sinagop nga batang babaye sulod sa lima ka oras samtang duha ka mga polis ang nangaangol atol sa rescue operation kagahapon sa kaadlawon diha sa barangay Kanhumawad sa lungsod sa Dumanjug.

Ang suspetsado nailhan nga si Jeffrey Carsolin, 34, molupyo sa maong lugar samtang ang iyang gi-hostage mao ang 11-anyos niining sinagop (pangalan gipugngan sa Banat News).

Sa pakighinabi sa Banat News sa hepe sa kapolisan sa lungsod sa Dumanjug nga si Chief Inspector Rolland Allecir mibutyag kini nga nianang alas-8 pa sa gabii nagsugod ang pag-hostage sa bata. Si Allecir lakip sa naangol sa hitabo.

Matud pa niini nga nagselos ang suspek ngadto sa iyang kapikas human kini makadungog og mga estorya sa mga silingan nga aduna kini karelasyong laing lalaki.

Kini maoy sinugdanan sa ilang panag-away apan tunga-tunga sa ilang panaglalis giingong gibunlot sa suspek ang sinagop ug gitiunan og kutsilyo.

Giingong misuway og hangyo ang kapikas sa suspek nga si Roquisa apan nagmagahi ang suspek hinungdan nga midagan nalang kini sa gawas ug nagpakitabang sa mga silingan kinsa mao na usab ang mitawag sa kapolisan.

Si Allecir nagkanayon nga unang miduol ug mi-negotiate ang uyoan sa suspek apan nagmagahi gihapon kini hinungdan nga giapil na sa plano ang paggamit og pwersa kun mopakita og timailhan ang suspek nga pasakitan ang bata.

Tungod niini si Allecir maoy nangunay sa pagpakig-estorya sa suspek isip negosyador ug nagpaila siyang managsilingan sila. Matud pa niini nga si Carsolin midemandang buot niining ika-estorya ang usa ka ginganlan og Jun nga giingong maoy karelasyon sa iyang asawa.

Ang mga sakop ni Allecir hinay-hinay nang mikamang sa gikahimutangan sa suspek samtang nagpadayon ang negosasyon.

Matud pang Allecir dangtan pipila ka gutlo nakamatikod ang suspek nga polis ang iyang kaestorya ug dihang mihunat kini pagdunggab sa bata diha na sa duol si PO1 Sabiniano Barominis kinsa maoy misawo sa kutsilyo.

Tungod niini gitabangan og layog si Carsolin nga miresulta sa pagkasamad ni Allecir sa kamot. Si Barominis nasamdan sa tuong kamot apan ilang nadakpan ang suspek ug naluwas ang bata.

Kasamtangan karon nga natanggong ang suspetsado samtang giandam na ang kasong ipasaka batok kaniya. (BANAT NEWS)