CEBU, Philippines - Duha ka gipasanginlang bigtime pushers ang nasikop sa kapolisan sa lungsod sa Tuburan ug Asturias sa mga sakop sa Provincial Investigation and Detection Management Branch sa miaging gabii sa managlahi nga lugar.
Pasado alas-6 sa miaging gabii nadakpan sa buybust operation sa barangay Bago lungsod sa Asturias si Jeffrey Blanco, taga barangay Colonia lungsod sa Tuburan.
Matud pa sa kapolisan nga nakadawat sila og report nga si Blanco magpalitan og ilegal nga drugas gikan sa dakbayan sa Sugbu ug nabatasan na niyang sa last trip kini mosakay ug bisan na sa sulod sa bus kun dunay mopalit og shabu iyaha kining baligyaan.
Tuod man nasundan sa kapolisan ang suspek nga gidudahang bag-ohay pang nakakompra og shabu ug dihang gipalitan ug mitunol sa gituohang shabu gisikop kini dayon.
Nakuha gikan kaniya ang tulo ka medium pack ug onse ka gagmay’ng pakete nga pulos may sulod nga gituohang shabu. Si Blanco mitug-an sa kapolisan nga gikan sa usa ka Joel Gadiana nga taga sitio Jai-alai barangay Mambaling ning dakbayan nagagikan ang iyang suplay sa shabu.
Tuod man ang operatiba sa kapolisan sa lungsod sa Tuburan ug PIDMB wala maglangan ug mihimo og buybust operation batok kang Gadiana nga miresulta sa pagkasikop niini.
Nakuha kang Gadiana ang usa ka dakong pakete sa gituohang shabu ug ang P500 nga buybust money.
Sa pakighinabi sa Banat News ni PIDMB chief Supt. Rodolfo Albotra kini mibutyag nga dugay na nilang gi-surveillance si Blanco ug ang hepe sa Tuburan nga si Sr. Insp. Mark Gifter Sucalit midangop sa ilang buhatan ug mihatag og impormasyon bahin niini. – BANAT NEWS