Gob ok kang Villarete hulip ni Francia

CEBU, Philippines - Andam nga dawaton ni Gob. Gwendolyn Garcia ang pagkatudlo kang Cebu City Planning and Development Officer Engr. Nigel Paul Villarete isip General Manager sa Mactan Cebu International Airport Authority (MCIAA).

Giklaro ni Garcia nga wala siyay pagsupak sa aplikasyon ni Villarete nga maoy mopuli kang outgoing GM Danilo Francia tungod lamang kay gituboy kini sa iyang kontra politika nga si kanhi mayor karon Cebu City South District Kong. Tomas Osmeña ug giendorsar usab ni Presidente Benigno ‘Noynoy’ Aquino III.

Kini bisan pa man sa una niyang gibuhian nga mga pamahayag nga ang musunod nga general manager sa MCIAA gikinahanglan nga pilian base sa iyang qualification ug dili sa political accommodation. Sigon pa sa gobernadora nga mibuhi man tuod siya niini apan wala siya naghisgot sa pangalan ni Villarete nga maoy gitumong sa iyang pamahayag.

Ang gobernadora nagkanayon nga ang iya lamang gipahimug-atan mao nga kinahanglan nga subayon ang mga rekisitos sa pagpili sa bag-ong GM sa MCIAA.

Apan si Garcia miingon nga si Francia pa gihapon ang iyang giilang labing maayong general manager sa MCIAA sanglit daghan na kaayong maayong kalamboan nga nahimo niini usa na niini mao ang nakuhang kapin sa usa ka bilyon ka pesos nga kita sa MCIAA karong tuiga.

Gipanghinaot sa gobernadora nga tupngan ni Villarete ang nahimo ni Francia o ba kaha malabwan pa ang mga nahimo niining kaayuhan sa MCIAA kay mao kini ang labing importanteng pasilidad sa Sugbu nga angayan ikapanghambog ngadto sa mga bisita sa gawas sa nasud.  – BANAT NEWS