Tulisan nailhan

CEBU, Philippines - Usa sa mga gitumbok nga tulisan nga mitulis sa Banco Maximo sa dalan A. del Rosario barangay Guizo sa dakbayan sa Mandaue sa miaging adlaw ang gisikop sa kapolisan human positibong gitumbok sa duha ka testigos.

Ang gidakop giilang si Michael Labora, kinsa unang giimbitar sa mga polis diha sa iyang balay sa sitio Upper Tabok barangay Tabok dakbayan sa Mandaue kagahapon pasado ala-una sa hapon ug giingong kanhi mekaniko sa gipatay nga si Crisostomo“Tata Negro” Llaguno ug nagpuyo sa Sambag 2 sa dakbayan sa Sugbu.

Ang grupo ni Insp. Ramil Morpos sa Investigation Detection and Management Bureau (IDMB) ug Chief Inspector Abraham Ocampo sa Station 1 maoy nakadawat og impormasyon kabahin sa gikahimutangan sa suspek.

Sumala pa sa gipadalang text message sa direktor sa Mandaue City Police Office nga si Sr. Supt. Noel Gillamac ang suspek positibong giila sa duha ka mga testigo nga si Labora maoy lookout ug maoy drayber sa gisakyang motorsiklo sa tulo ka armadong tulisan.

Nakuha gikan kang Labora ang usa ka Honda XRM nga motorsiklong walay plaka nga mitakdo sa deskripsyon sa motorsiklong gisakyan sa pag-ikyas sa mga tulisan

Si Labora nasuta nga bag-ohay pang nakagawas gikan sa Cebu City Jail tulo na ka bulan ang nakalabay. Apan kini kusganong mihimakak sa pasangil ug nangangkong natulog lamang siya sa ilang balay nianang nahitabo ang pagpanulis.

Si Gillamac miingon sayo kagahapon nga mga local boys ang maong grupo apan ilang gituohan nga mga professional.

Ang mga tulisan nakasakiyo og gibanabanang dul-an P40 mil gikan sa maong bangko lakip na ang mga cellphone sa mga kawani ug armas sa gwardiyang ilahang gidisarmahan.

Samtang gipahibalo ni Gillamac nga adunay duha ka police beat patroller diha sa nahitaboan nga iyang paimbestigahan tungod sa nahitabo. Padayon pa usab ang pagpangita sa laing tulo ka mga tulisan. Nagduda usab si Gillamac nga mao rang grupo gihapon ang mitulis sa LBC branch diha sa dalan A.S. Fortuna sa barangay Banilad sa maong dakbayan sa miaging semana.  - Ug report ni Flor Perolina sa The Freeman (BANAT NEWS)