CEBU, Philippines - Ang hepe sa Talisay City Police Station nga si Superintendent Henry Biñas miawhag sa publiko ug sa mga tagdumala sa mga establisamento nga motabang sa kapolisan pagsanta sa krimen.
Si Biñas nga nahinabi sa Banat News kagahapon nagkanayon nga matag-adlaw mibisita sila sa mga bangko diha sa siyudad ug sa ubang establisamento ug gani adunay mga polis usab nga gidestinong magpatrolya sa barangay Tabunok diin nahimutang ang mga bangko ug uban pang mga establisamento.
Hinuon matud sa hepe nga dili sila makapugong sa mga insidente nga mahitabo apan kutob sa ilang mahimo ilang gipaningkamutan nga walay mahitabo nga dili maayo.
Ang Talisay adunay kapin napulo ka mga bangko ug si Binas dili gustong mahitabo sa Talisay ang ulahing nahitabo sa dakbayan sa Mandaue diin ang Banco Maximo gitulis.
Giawhag ni Biñas ang mga tagdumala sa mga bangko ug uban pang establisamento nga magmabinantayon ug mo-report dayon ngadto sa kapolisan kung adunay mga tawo nga kadudahan ang mga lihok sa ilang lugar.
Gibutyag usab niya nga kanunay silang mipahigayon og saturation drive diha sa mga lugar nga posibleng tagoan sa mga tulisan ug uban pang mga kriminal. – BANAT NEWS