PESO sa Mandaue nakadawat award

CEBU, Philippines - Nakadawat og pasidungog ang dakbayan sa Mandaue isip labing maayo nga Public Employment Service Office (PESO) nga usa ka highly urbanized nga dakbayan dinhi sa nasud.

Si Mosoline Suliva nga maoy PESO manager sa maong dakbayan sa press conference miingon nga ang paghatag og pasidungog nga ilang nadawat gikan sa central office sa Department of Labor sa kaulohan.

Matud pa niya nga ang aktibo nilang kalihokan sa pagtabang sa mga aplikante nga makasulod og trabaho maoy nag-unang gibasehan sa maong award.

Si Suliva miingon nga dako kaayo og natabang sa pagpasulod og trabaho sa mga aplikante sa nagkadaiyang job fair nga ilang gipasiugdahan uban sa mga opisyal sa DOLE.

Gitataw niya nga sa milabay’ng buwan nakapasulod sila og trabaho sa kapin 1,000 ka aplikante nga nadawat sa mga lokal nga trabahoan ug pipila usab kanila ang nakatrabaho sa gawas sa nasud.

Dugang pa ni Mosoline nga ilang giyahan ang mga aplikante nga   madawat sa ilang giaplayan nga trabaho. – BANAT NEWS