CEBU, Philippines - Naghikog ang usa ka konduktor sa PUJ pinaagi sa paghigot og pisi sa iyang liog sulod sa ilang gipuy-an sa sitio Tayud, barangay Basak Pardo ning dakbayan sa miaging hapon.
Ang naghikog giila sa kapolisan nga si Richelle Tabora, 31, ulitawo, apan adunay kapuyo, ug usa ka konduktor sa PUJ.
Ang iyang kapuyo nga si Marilou maoy nakakita kang Tabora nga nagbitay na sulod sa ilang lawak. Sa imbestigasyon ni PO3 Ruth Violango ug mga kaubanan sa Homicide, nasayran nga sayo sa miaging buntag nagkalalis si Marilou ug si Tabora gumikan kay kanunay kuno kining moinom og ilimnong makahubog sayo sa buntag. Hinungdan nga iya kining gibadlong apan wala siya magdahom nga magpakamatay diay kini. Dugang pakisusi sa kapolisan nga human sa lalis ni Tabora ug sa iyang live-in partner, milakaw ang naulahi ug mibalik sa ilang balay niana nang alas 4:00 sa hapon apan maoy misugat sa iyang panan-aw ang nagbitay nga patay’ng lawas sa iyang kapuyo.
Dali siyang nakapangayo og tabang sa iyang mga silingan hinungdan nga miresponde dayon si Kapitan Dave Tumulak uban sa iyang mga tanod apan patay na si Tabora. – BANAT NEWS