CEBU, Philippines - Napriso na hinuon ang usa ka bana nga namusil og tulisan sa dihang gitulis ang asawa niini diha sa sitio Sangi sa barangay Pajo dakbayan sa Lapulapu sa milabay’ng hapon.
Ang nasikop mao si Nicole Igot Tapao, 26, ug residente sa sitio Matumbo barangay Pusok dakbayan sa Lapulapu.
Si PO2 Porferio Doble Jr. maoy misikop ni Tapao mga alas 3:30 sa milabay’ng hapon kinsa luwan niadtong tungura sa usa ka traysikol dihang usa ka masipang buto ang iyang nabati ug iyang nakita si Tapao nga namusil sa maong dapit hinungdan nga kini mikanaug ug miresponde.
Si Tapao nakuhaan og kalibre .45 pistola ug duha ka magazine nga adunay sulod nga walo ka buhing bala niini ug ang sakoban sa maong armas.
Gumikan kay walay gipakitang lisensiya si Tapao gisikop kini ug gidala sa buhatan sa kapolisan.
Nasuta nga si Tapao nagpabuto sa iyang armas gumikan kay iyang gipusil ang usa ka tulisan nga mitulis sa iyang kapuyo sa maong dapit apan wala kini maigo ug nakaikyas.
Matod pa ni Doble mag-atubang og kasong kalapasan sa Comelec gun ban si Tapao human kini napakyas sa pagpakita og dokumento nga naglegalisar sa paghupot niini sa maong armas. – BANAT NEWS