CEBU, Philippines - Mipasangil si Daanbantayan Mayor Maria Luisa Loot ngadto kang Gob. Gwendolyn Garcia nga nag-apil apil kini sa piniliay sa Barangay ug Sangguniang Kabataan elections pinaagi sa pagpaluyo og mga kandidato sa barangay nga nakig-atbang sa mga incumbent barangay officials sa ilang lungsod nga nagpasubli sa umaabot piniliay.
Gibutyag ni Loot atol sa interbyu sa Bantay Radyo nga gipaluyohan sa gobernador ang iyang mga kaatbang sa ilang lungsod nga kanhi mga lider kaniadto sa Liberal Party sa naparot nga kandidato pagkagobernador Hilario Davide III.
Gipasabot ni Loot nga gipanabi ug gigamit karun sa mga mikandidato ang pangalan sa gobernador nga maoy nag- endorsar ug nagsuporta kanila.
Nunot niini nanawagan si Loot sa iyang mga molupyo sa ilang lungsod nga sigurohon ang pagbotar niadtong mga kandidato sa barangay nga tarong moserbisyo ug dunay prinsipyo ang pagkatawo.
Si Garcia wala kakuhai og tubag sa maong alegasyon kinsa kagahapon lang miabot gikan sa nasud sa China, apan ang iyang consultant nga si Atty. Jose Mari Gastardo midepensa kaniya ug miingon nga dili mahitabong motugot ang gobernador nga gamiton ang pangalan niini sa ilang pagpangampanya.
Hinuon giklaro niyang polisiya na sa Kapitolyo ang pagsuporta sa si bisan kinsang modaog nga opisyal nga magkinahanglan og tabang. Si Garcia daan nang miklarong wala siyay suportahang kandidato sa barangay.
Ang tigpamaba ni Garcia nga si Rory Jon Sepulveda mihimakak usab sa maong alegasyon.
“Governor is not involving herself in these barangay elections. Somebody must be seeing, hearing and feeling ghost,” matud pang Sepulveda.
Ang buhatan ni Provincial Election Supervisor Lionel Marco Castillano miingon nga kalapasan ang pagtabang sa mga lokal nga opisyal sa barangay elections apan kinahanglang aduna gyuy mopasaka og pormal nga reklamo ngadto sa legal department sa Comelec Manila office. - Darrel Carumba, Chester Abadilla ug Greg Rubio (BANAT NEWS)