CEBU, Philippines - Usa ka 23-anyos nga lalaki ang gipatay sa iyang ama-ama nga iyahang nalupig sa sinukmagay diha sa barangay Dapitan sa lungsod sa Cordova niadtong Miyerkules sa ala 1:30 sa hapon.
Ang biktima nga patay na pag-abot sa tambalanan mao si Arven Manayon, 23, molupyo sa nahisgutang lugar samtang ang suspek mao si Dante Siladis, 47, nga usa ka panday, kansang kapuyo mao ang inahan sa biktima nga si Yolanda Manayon.
Matud ni SPO1 Laurencio Wagwag sa Cordova Police Station dihang nahinabi sa Banat News subay sa imbestigasyon, ang duha nagkalalis gumikan kay gusto sa suspek nga pahunongon sa pagtungha ang 9-anyos nga manghod sa biktima.
Giingong buot sa suspek nga patabangon nalang kini sa iyang pagpamanday. Apan misangko kini sa sinukmagay apan gilupig sa biktima ang suspek maong midagan kini sa ilang balay ug mikuha’g sundang dayong duslak sa kilid sa biktima. Ang biktima bisan sa dakong samad misuway og dagan palayo apan nahagba kini pipila ka metros. Gisuwayan pa unta og tabang ang biktima ug gihatud sa Cordova District Hospital apan gideklarar sa mga doktor nga dead on arrival.
Samtang ang suspek nagdaling misibat ug mitahan sa iyang kaugalingon sa ilang silingan nga si Ret. Chief Insp. Jovino Baguio ug mao nay mi-turnover kaniya sa kapulisan. – BANAT NEWS