Bangko gitulis

CEBU, Philippines - Gitulis sa upat ka armadong mga lalaking nagsakay og motorsiklo ang Banco Maximo nga nahimutang sa dalan A. del Rosario sa barangay Guizo, dakbayan sa Mandaue kagahapon sa udto.

Si Sr. Supt. Noel Gillamac, direktor sa Mandaue City Police Office nga maoy nangulo sa paghimog pakisusi miingon nga ang tulo sa upat ka mga lalaki nagpakaaron-ingnon nga mga kustomer ug misulod sa bangko.

Human niini daling gidisarmahan ang nag-inusarang gwardiya nga si Ernesto Doydora, 24, sakop sa R-Mac Security agency ug gipangtionan ang mga kawani nga sila si Roselyn Sab-a, 24, taga Camputhaw sa dakbayan sa Sugbo; Marites Entienza, 26, taga Bulacao, dakbayan sa Sugbo ug Richie Remulta nga usa ka trainee.

Ang mga biktima gipanghimulbolan sa ilang mga cellphone ug giingong gipahapa sulod sa vault sa maong bangko samtang gipanghabwa sa mga tulisan ang mga salapi ug gipangsulod sa ilang gidalang knapsack. Gibana-banang mokabat sa P40 mil ang nasakiyo sa mga tulisan apan wala pa kini makompirmar sa kapolisan sanglit nagpadayon pa ang imbentaryo sa mga nangasakiyong kwarta atol ning pagsulat sa balita.

Matud pa ni Gillamac nga ang guwardiya nga si Doydora kinsa mitan-aw sa mga dagway sa mga tulisan nakaangkon og bun-og sa nawong human kini gilaparo makadaghang higayon sa mga tulisan. Si Doydora mihulagway sa mga tulisan nga desentihon og pamarog ug pananina. Human sa pagpanulis daling nanakay ang mga tulisan sa motorsiklong gimaneho sa ilang kauban nga nagsilbi usab nga lookout diha sa gawas.

Si Gillamac miingon nga subay sa gitug-an kaniya sa mga kawani sa maong bangko iyang nahibaw-an nga niadtong Martes ilang namatikdan ang wala mailhing lalaki nga nagpakisusi labot sa pagdeposito og kwarta. Matud pa niya nga daan na nilang nadawat ang intelligence report nga adunay nangabot nga grupo sa mga tulisan dinhi sa Sugbo maong gipasidan-an na nila ang mga tagdumala sa negosyo sa dakbayan sa pagpalig-on sa ilang siguridad.Naglakip sa iyang gipahimangno ngadto sa mga tagdumala og establisamento sa dakbayan ang pagbutang og close circuit television camera, ang maong bangko wala niini.Sa kasamtangan ang mga sakop sa Scene on Crime Operation (SOCO) ang naghimo na sa paghipos og mga ebidensiya sa maong pagpanulis nga naglakip sa mga fingerprints sa mga tulisan.

Sa nasayran nga niadtong miaging Sabado sa miaging semana maoy biktima sa pagpanulis sa tulo ka armadong lalaki nga nagsakay og motorsiklo ang LBC sa dalan A.S. Fortuna sa barangay Banilad sa maong dakbayan ug mokabat sa P5,000 nga salapi ang nasakiyo niini. – BANAT NEWS