Inilang boksidor nangulata

CEBU, Philippines - Usa ka kanhi inilang boksidor gireklamo nga nangulata og drayber sa taxi didto sa barangay Basak-Pardo, ning dakbayan sa Sugbo sa miaging Lunes sa gabii.

Ang biktima mao si Alexander Melendrez, hingkod, ug usa ka drayber sa taxi nga taga Basak-Pardo, samtang ang suspetsado giila usab nga si Andy Tabanas, 41, minyo, nga taga Basak-Pardo ra usab ug usa ka retiradong boksidor, kinsa sakop usab sa Barangay Intelligence Network (BIN) sa ilang barangay.

Ang misumbong ngadto sa Pardo Police Station mao sila si Beverly Ercido ug Maribel Melendrez, pulos mga igsoon sa biktima.

Gawas kang Tabanas, may duha pa usab ka tanod sa Basak-Pardo nga sila si Henry Navarro ug Zandra Ahig ang giingong kauban ni Tabanas nga mikulata kang Melendrez.

Si Beverly ug Maribel nga nahinabi sa mga tigbalita kagahapon sa buntag mibutyag nga niadtong Lunes sa gabii si Alexander ug ang kapuyo niining si Juvy Cabulao nagkalalis sa personal nga suliran sa ilang pagpuyo.

Sa maong lalis miinit ang ulo ni Melendrez ug giingong gidukol niini og plato ang ulo ni Juvy.

Gumikan sa maong kaguliyang, naalarma ang mga tanod ug dihadiha gidala dayon nila si Melendrez ngadto sa Pardo Police Station.

Matud nila ni Beverly ug Maribel nga wala mopakita og pagsukol ang ilahang igsoon ngadto sa mga tanod nga midala kaniya.

 Midugang si Beverly ug Maribel nga mikuyog usab ang ilang igsoon nga walay bun-og ang kalawasan.

Apan pag-abot nila sa buhatan sa kapolisan sa Pardo, kay misunod man sila ngadto, nakurat nalang sila dihang nasud-ong nila sulod sa prisohan ang igsoon nilang si Alexander nga gusbat na ang dagway , nagtikuko gumikan mga bun-og sa tiyan, buko-buko ug ubang bahin sa lawas.

Midugang sila si Beverly ug Maribel nga dali nilang gidala sa hospital si Alexander aron ipa-medical check-up ug mibahad sila nga mopasaka gyud og kaso batok sa mga responsable.

Si PO3 Robert Bobby Escarlan, imbestigador sa Pardo Police Station nagkanayon nga malagmit mi-resist siguro si Melendrez ug maoy hinungdan nga gisumbag siya ni Tabanas busa mihuboy ang mata sa nahauna.

Midugang si Escalarlan nga kun didto pa kulataha si Melendrez sa ilang buhatan ug nakit-an sa polis, dili mahitabo nga dili nila pakgangon si Tabanas.

Apan matud pa niya nga bun-og nang daan si Melendrez nga gihatod sa ilang buhatan, dugang pa niyang pamahayag sa Banat News.

Si Andy Tabanas igsoon ni Efren Tabanas, ang usa usab sa iniling boksidor nga Sugboanon.

Ang katapusang duwa sa ring ni Andy mao ang pagpakigharong niya sa usa ka Puwerto Rican nga si Nelson Dieppa sa Asia Pacific lightflyweight niadtong Mayo 14, 2001 diin naparot siya kay nalukapa o na knock out sa ikaduhang hugna sa ilang away. - Rey Pasaporte, Brenda D. Batuto ug Lemuel Maglinte (BANAT NEWS)