Geohazard mapping wa pa mahuman

CEBU, Philippines - Giangkon sa mga opisyales sa Mines and Geosciences Bureau (MGB) nga hangtod karon wala pa gihapon nila mahuman ang   Geohazard Mapping (GM) dinhi sa Central Visayas.

Kini taliwala sa nag-ungaw nga kahimtang sa mga tawo nga nagpuyo sa mga lugar nga kuyaw sa landslide ug flashflood.

Apan si MGB-7 Regional Director Lorito Alburo mipasalig nga hayan taposon sa ilang buhatan karong bulana (Oktobre) ang nahisgutang GM.

Matud pa ni Director Alburo nga may 2,167 ka mga barangay ang ilang gisusi kun dili ba kini pilegrong puy-an sa mga tawo sa panahon nga tinguwan.

Si Alburo nagkanayon nga ilang gidali ang paghuman sa GM aron ikahatod dayon nila kini ngadto sa mga hingtungdang Local Government Unit (LGU) kansang mga sakop nga barangay peligrong puy-an.

Giklaro ni Alburo nga nalangay ang ilang paghuman sa GM tungod sa kadaghan sa mga empliyado nila nga nang-resign sa katungdanan kay gikuha sa mga pribadong kompanya nga mitanyag og mas dakong suhol ug benepisyo.  – BANAT NEWS