Duha patay sa motor vs. traysikad

CEBU, Philippines - Duha ang patay sa panagsaghid sa motorsiklo ug traysikad human nabunal ang ilang mga ulo sa sementadong dalan sa miaging alas-9 sa gabii sa national highway sa barangay Baliwagan sa lungsod sa Balamban.

Si Danilo Rio Cortez ,38, taga sitio Bangbang sa barangay Nangka ug traysikad drayber gideklarar nga patay na pag-abot sa Balamban District Hospital.

Samtang ang drayber sa motorsiklo nga Honda nga nagtangag sa plakang LI-1185 nga si Recesio Mangitngit, 30, molupyo sa maong lugar gibalhin sa Vicente Sotto Hospital sa dakbayan apan ang kapulisan kagahapon sa hapon nakadawat og impormasyon nga nakabsan usab kini sa kinabuhi nianang pagkabuntag.

Si PO2 Cesar Climaco sa Balamban Police Station mitug-an sa Banat News nga base sa gibutyag ni PO3 Celso Diaz ang gipulihan niyang imbestigador kagahapon miingon nga nakabsan sa kinabuhi si Mangitngit apan wala pay tagtungod nga mikumpirmar niini kanila kagahapon.

Matud pa ni Climaco nga kusog ang dagan sa motorsiklo niadtong higayona paingon sa barangay Poblacion.

Matud ni Climaco nga wala madayon og overtake si Mangitngit kay dunay gikasugat nga laing sakyanan, apan sa iyang pagbalik sa lugar iya na hinuon nasaghiran ang traysikad ug nangatuwad.

Daling gidala sa maong tambalanan ang duha gumikan sa kagrabe sa ilang nahiagumang mga kadaot sa ulo ug kalawasan.  – BANAT NEWS