Liboang pamilya gipabakwit

CEBU, Philippines - Liboang mga pamilya ang gipabakwit sugod niadtong milabay’ng adlaw tungod sa pagsulod sa super typhoon Juan kagahapon sa udto diha sa Isabela ug Cagayan provinces .

Samtang usa ka 53-anyos nga lalaki ang giingong gianod sa suba diha sa Tuguegarao sa Cagayan Valley.

Ang maong bagyo adunay gikusgong 225 kilometers per hour (kph) nga hangin duol sa mata niini apan mihinay kini pag-abot sa kayutaan sa amihanang bahin sa Sierra Madre mountain ranges. Base sa Twitter account sa Philippine Atmospheric Geophysical and Astronomical Services Administration (PAGASA), ang Aparri Radar nakakita sa mata sa maong bagyo diha sa Estagno Point duol sa Divilacan Island sa baybayon sa Isabela province pasado alas 11:25 sa buntag sumala pa sa report sa GMA News.Tv.

Dako ang natabang sa kabukiran sa Sierra Madre maong mihinay ang hapak sa hangin diha sa mga tanaman nga gikunsiderar nga maoy tinubdan sa halos tanang pagkaon sa Luzon.

Gipaabot nga mogawas si “Juan” diha agi sa Ilocos Sur ug La Union karong buntag.

Dugang report gikan sa Associated Press nagkanayon nga si “Juan” nagdala og kusog nga hangin ug grabeng pag-ulan ug maoy gikunsiderar nga labing kusog nga bagyo nga misulod sa Pilipinas sulod sa milabay’ng upat na ka tuig.

Kahinumduman nga ang bagyong Reming niadtong 2006 adunay gikusgong 250 kph winds nga nakaingon sa grabeng mga landslides ug mikalas og gibana-banang 1,000 ka tawo sa Bicol region. Kagahapon ang nagkadaiyang rescue groups sa gobiyerno miplastada dayon sa ilang mga kahimanan aron makaresponde sa nagkadaiyang lugar. Tungod sa kakusog sa bagyo gikanselar ang mga klase sa rehiyon 1, 2, ug Cordillera Autonomous Region(CAR).

Samtang ang National Disaster Risk Reduction and Management Council (NDRRMC) kagahapon mipahibalong adunay mga subtransmission lines sa Cagayan nga nag-trip off hinungdan sa mga brownouts apan nabalik na kini dayon sa National Grid Corporation of the Philippines. Samtang dinhi sa dakbayan sa Sugbu, giawhag sa Cebu City Disaster Coordinating Council ang mga opisyales sa barangay nga monitoron ang mga nanimuyo sa bukid ug sa mga sapa gumikan sa dakong hulga sa mga kalamidad tungod sa sunod-sunod nga pagbundak sa uwan.

Nagkanayon si Mayor Michael Rama nga kinahanglang alerto kanunay ang mga Barangay Disaster Brigades uban usab sa ilang mga volunteers aron mahimoan dayon og aksiyon kung dunay mga landslides ug pagbaha sa ilang “area of responsibility”. Ang executive officer sa CCDCC Alvin Santillana mipadayag nga giandam ang 51st Ready Reserve Marine Battalion, City Environmental Sanitation and Enforcement Team, Bureau of Fire Protection Special Rescue Unit, Emergency Rescue Unit Foundation, Basak-Pardo Emergency Rescue ug uban pa nga mga private rescue groups pagtubag sa katalagman.

Kahinumduman nga duha ka mga balay ang natabunan sa nahitabong landslide sa miaging adlaw sa usa ka dapit sa barangay Lahug ning dakbayan human midahili ang yuta gumikan sa kusog nga uwan nga miresulta pagkatimba sa usa ka punoan sa kawayan .

Samtang pipila ka mga dapit ang duol kaayo sa pagbaha mao ang pipila ka mga sitio sa Guadalupe, Mabolo, Camputhaw, Mambaling, Tinago, Capitol, Labangon, Lorega, Lahug, Tejero ug uban pa. (BANATNEWS)