CEBU, Philippines - Gipahimangnoan ni Provincial Board Member Thadeo Ouano ang mga molupyo sa ikaunom nga distrito sa pagpabakwit gyud kun may bagyo.
Si Ouano nga maoy chairman sa committee on environment sa hunta probinsiyal sa iyang gipalabang nga resolusyon mipasabot sa mga molupyo nga peligro kaayo ang bagyo kun kompiyansahan.
Matud pa ni Ouano nga kun delikado ang kahimtang sa mga anaa sa ilang balay, mas kuyaw kadtong mga mananagat kun hiabtan sa kusog nga hangin didto sa dagat.
Gawas sa dagat, ang nagpuyo sa daplin sa sapa, baybayon ug pangpang peligro usab kaayo sa panahon nga may bagyo busa angayan gyung mobakwit aron dili mapagan sa maong katalagman.
Sa nasayran si Gobernador Gwen Garcia una mobiya paingon ngadto sa China sa miaging adlaw, mipahinumdom sa mga sakop sa Provincial Disaster and Coordinating Council (PDCC) nga mangandam pag-ayo gumikan sa bagyong Juan.
Lakip nga gipahimangnoan sa gobernador mao ang provincial engineering office kinsa gitahasan sa pagbantay sa mga taytayan nga mahunlak.
Unya mao usab ang Integrated Provincial Health Office (IPHO) kansang tahas mao ang paghatod dayon og tambal ngadto sa mga dapit nga maigo sa katalagman, samtang ang Provincial Social Welfare and Development, gisugo usab sa pagdala gilayon og pagkaon sa mga biktima sa katalagman. (BANATNEWS)