CEBU, Philippines - Gibuhian na sa kostudiya sa hepe sa kapolisan sa lalawigan sa Sugbo si Guillermina Barrido nga unang mialegar sa kontrobersyal nga sinagop sa mayor sa dakbayan sa Talisay nga si Joavan Fernandez nga tigpayuhot og shabu ug may koneksyon sa mga awtoridad.
Matud pa sa direktor sa Cebu Provincial Police Office nga si Sr. Supt. Erson Digal sugod kagahapong adlawa iyaha nang gibuhian sa ilang kostudiya si Barrido.
Si Barrido milayas gikan sa buhatan sa CPPO sukad pa niadtong milabay’ng semana nga wala mananghid ug nahibaw-an nalang nakig-uliay na kini sa maayong kabubut-on kang Joavan.
Si Joavan dihang unang nakahinabi sa Banat News niadtong milabay’ng semana mibutyag nga miangkon si Barrido kaniya nga ‘scripted’ lang ang tanang gipamahayag niini batok kaniya ngadto sa kapolisan.
Si Joavan midugang nga giingong gisulsolan lamang sa kapolisan si Barrido aron siya iduot. Kini kusganon hinuon gihimakak sa mga opisyal sa kapolisan nga gipasanginlang utok sa pagduot kang Joavan.
Gisuwayan pa unta ni Digal pag-refer kang Barrido sa Philippine Drugs Enforcement Agency aron maoy mokostudiya kaniya apan wala kini dawata sa maong buhatan. Matud pang Digal nga dili na sila manginlabot kang Barrido tungod sa kabalakang mogawas lang kini gihapon sa ilang proteksyon. (BANATNEWS)