CEBU, Philippines - Patay ang usa ka lalaki human gipusil sa nawong sa wala mailhing mamumuno samtang nanihapon pasado alas-9 sa miaging gabii sa sitio Caloboon sa barangay Batad-batad lungsod sa Moalboal.
Ang biktima nailhan nga si Alvin Sambilan, biyudo ug lumad nga molupyo sa barangay Bayabas lungsod sa Argao.
Base sa inisyal nga imbestigasyon sa kapolisan ang biktima nanihapon nianang tungura uban sa iyang higala nga si Ricardo Lagaylay ug sa anak niini nga si Eladio.
Samtang nangaon ang tulo kalit lang nga adunay mipabuto og armas sa ilang lamesa nga gikakugang sa tulo hinungdan nga naalibwag silang tulo apan nausban pa duha ka higayon ang pagbuto sa armas ug diha-diha nahagba si Sambilan. Ang biktima naigo sa walang bahin sa iyang nawong nga maoy hinungdan sa iyang hinanaling kamatayon.
Matud pa sa kapolisan nga posibleng nagtago ang mamumuno sa ngitngit nga bahin hinungdan nga wala makit-i sa mga kauban sa biktima kun si kinsa ang maong mamumuno. (BANATNEWS)