Butuanon bridge nga nagbahirig gisusi
CEBU, Philippines - Gitakdang ipagawas na sa dili madugay ang resulta sa survey nga gihimo sa rehiyonal nga buhatan sa Department of Public Works and Highways (DPWH) kalabot sa kasamtangang kahimtang sa Butuanon Bridge sa dakbayan sa Mandaue.
Sa maong survey masayran kun unsa katalandugon ang maong tulay nga daan nang gikahadlokan sa kadaghanan nga mahunlak tungod sa kagabok.
Nasayran nga nagbahirig na ang maong taytayan ug matud pa sa ubang tigpaniid nga huypon lang, malusno na.
Si Mayor Jonas Cortes nga nakadawat sa maong kasayuran mimando dayon sa mga tinugyanan sa Traffic Enforcement Agency of Mandaue (TEAM) nga pabantayan ang maong tulay nga agianan sa mga sakyanan paingon sa amihanang kalungsoran.
Nunot niini si Konsehal Demetrio Cortes Jr., mipalabang og resolusyon nga nag-awhag sa city engineer sa pagsusi sa kahimtang sa maong taytayan.
Sa pagkakaron kontrolado ang dagan sa mga sakyanan nga molabang sa maong tulay aron kalikayan ang pagkahunlak niini. (BANATNEWS)
- Latest
- Trending
