CEBU, Philippines - Naangol ang usa ka lalaki human kini dunggaba sa iyang silingang hubog niadtong milabay’ng Biyernes sa gabii diha sa barangay Bitoon sa lungsod sa Daanbantayan.
Nalandig sa tambalanan ang biktimang si Roberto “Berto” Pilapil, residente sa sitio Tagasa sa samang barangay samtang nadakpan usab sa gihimong hot pursuit operation sa kapolisan ang suspek nga si Elmar “Siloy” Liquigan, 26.
Base sa gihimong imbestigasyon sa Daanbantayan Police station ang biktima kauban sa iyang mga higala nga nag-inom sa maong lugar dihang kalit nga miabot ang suspek nga pwerteng huboga.
Matud pa nga kalit miduol ang suspek dayong hansak duha ka higayon sa gidala niining kutsilyo ngadto sa kalawasan sa biktima hinungdan sa nahitabong kaguliyang apan nakaipsot ang suspek.
Ang biktima daling gidala sa Daanbantayan District Hospital ug gibalhin sa Vicente Sotto Memorial Medical Center tungod sa kagrabe sa samad niining naangkon.
Ang kapolisan pinangulohan ni PO3 Mamerto Gastador uban nila ni PO2 Esraelito Eballe, PO2 Henry Compuesto ug PO1 George Banatasa misikop sa suspek human ang tanod nga si Julito Rusel mipahibalo kanilang nasigpatan ang suspek diha sa maong barangay.
Padayon pang gitino sa kapolisan kung unsay motibo sa pagpanunggab sa suspek ngadto sa biktima. (BANATNEWS)