Tindahan gilungkab P200 mil nakawat

CEBU, Philippines - Sobra sa 200 mil pesos nga halin sa usa ka tindahan og mga bugas sa merkado sa Poblacion-2 lungsod sa Carcar ang gisakiyo sa kawatan kagahapon sa alas 7:30 sa buntag.

Ang nanag-iya sa gilungkab nga tindahan mao ang negosyante nga si May Reuyan Go, molupyo sa Inayawan siyudad sa Sugbo apan dunay negosyo sa maong lungsod.

Matud pa ni PO1 Rosendo Benondo sa Carcar police dihang nahinabi sa Banat News ang mga katabang sa biktima kagahapon na sa buntag maoy nakadiskubre sa maong pagpanglungkab dihang paingon na unta sila mangabli.

Gituohan nga nahitabo ang pagpanglungkab nianang pagkakaadlawon ug giingong gigunting sa mga kawatan ang atop nga sin aron makasulod ug giguba ang vault sa tindahan gamit ang martilyo.

Sumala pa nga gihurot og kuha sa mga kawatan ang kwarta nga halin sa bugas sa milabay’ng adlaw.

Ang kapulisan padayon pa sa ilang imbestigasyon ug gikatakdang kuhaan og fingerprints ang kisame ug ang vault sa maong tindahan aron makatabang pagtumbok sa mga kawatan. (BANAT NEWS)