Cordova way hot spot

CEBU, Philippines - Giklaro ni Provincial Election Officer Lionel Marco Castillano nga walay election hot spot   ang lungsod sa Cordova.

Kini sukwahi sa migawas nga taho nga matud pa may mga barangay sa nahisgotang lungsod nga giisip nga hot spot nga nakapahingangha ni Mayor Adelino Sitoy.

Hinuon gipasabot ni Castillano nga ang Cordova nahilakip sa ilang watchlist ug padayon nilang gipanid-an ang kasamtangang kahimtang sa kahapsay ug kalinaw sa maong lugar.

Sa sayo pa, mireklamo si Mayor Sitoy dihang nadawat ang taho nga ang Cordova usa sa mga hot spot nga lugar sa lalawigan sa piniliay sa Oktobre 25.

Matud pa ni Sitoy nga nakurat siya  sa maong taho kay sa 13 ka barangay sa Cordova walay bisan usa niini nga naggubot sa nanglabay nga piniliay.

Sa sayo pa gibutyag ni Senior Superintendent Patrocinio Comendador Jr., sa intelligence division sa Police Regional Office 7 nga may kaping usa  ka gatos na ka dapit ang natala sa watchlist sa Comelec karong panahona nga bantayanan niining umaabot nga eleksyon. (BANAT NEWS)