Polis nga miresponde nasukmagan

CEBU, Philippines - Usa ka polis nga miresponde sa away sa mga batan-on mao hinuoy nasukmagan kagahapon sa kaadlawon diha sa barangay Poblacion, dakbayan sa Talisay liwas sa pista sa siyudad.

Ang Talisay nagsaulog sa kapistahan niadtong Biyernes maong daghang mga hubog diha sa kadalanan ilabi na sa barangay Poblacion diin gipahigayon ang mga kalihukan sa pista.

Ang naigo sa kinumo mao si PO1 Vincent Mary Arboladura, polis nga ubos sa Field Training Program (FTP) ug nadestino diha sa Talisay City Police Station.

Ang suspetsado mao sila si Jefrey Cabellon, 20, taga sitio Kabanayan, barangay Bulacao, Talisay ug usa ka 17-anyos nga taga barangay Dumlog sa nahisgutang siyudad giingong parehong mga hubog.

Si Arboladura uban nila ni PO1 James Ray Gador ug ni PO1 Venerando Bacalso Jr. mitubag sa alarma kabahin sa nahitabong gubot diha sa nahisgutang lugar.

 Gikatahong si Cabellon giingong mihapak og basiyo sa botilya sa bino ngadto sa 17-anyos sa walay igong hinungdan apan wala kini maigo ug ang naigo mao ang usa ka Roy Jimenez hinungdan nga nagkarambola.

Dali usab silang nagtibulaag pag-abot sa mga polis samtang si Cabellon misulod sa balay ni Paul Yares aron makatago samtang ang 17-anyos nga naapsan giingong maoy misukmag kang Arboladura. (BANAT NEWS)