CEBU, Philippines - Hugtanong gihimakak sa kapulisan ug sa mga mananambal ang mibaniog nga report nga dunay babayeng katabang sa usa ka inilang tawo sa lungsod sa Carcar ug usa ka iro niini nga wala mag-ukang.
Matud pa sa maong report giingong misulod sa tangkal ang maong babaye nga nagtapis ug diha-diha gipatungan sa dakong iro ug wala na mag-ukang maong gidala sa tambalanan.
Apan ang deputy police chief sa Carcar Police nga si Insp. Patrocinio Baylosis dihang nahinabi sa Banat News mihimakak nga adunay susamang nahitabo sa ilang lugar. Sumala pa niini nga imposible kaayong bisan usa sa ilang mga sakop ang wala makahibalo sa maong report.
“Syaro naman pud og dili sila manabi diri nako ug naa man gani nang balitaa,” dugang asoy ni Insp. Baylosis.
Samtang gibutyag usab sa usa sa mga kawani sa Carcar District Hospital nga si Marivic Candelario dihang nahinabi sa Banat News nga walay nalandig sa ilang tambalanan nga pasyenteng susama niini nga kaso. Gihulagway ni Candelario nga way basehanan ug hinimo-himo lamang ang maong report nga gipadako ug gihimoan lang dayun og estorya bisan walay nakakumpirmar sa report.
Gidugang ni Candelario nga niadtong milabay’ng Lunes duna siyay nadunggang estorya nga susama niini dihang usa sa iyang mga silingan diha sa barangay Bolinawan ang mitawag kaniya ug nagpangutana kabahin sa maong report.
Apan tungod kay wala man silay nadawat nga susamang kaso iyaha kini gibalibaran apan nianang pagkasunod adlaw iyahang gisusi sa ilang rekord apan wala gyuy susamang hitabo.
Giangkon hinuon ni Candelario nga tungod sa maong napublikar nga balita daghan na kaayo ang nanawag ug nagpakisayod sa kabalido sa maong hitabo diha sa ilang tambalanan apan pulos kini niya gi-prangkahan ug gitug-anan nga wa kini kamatuoran ug gimugna-mugna lamang.
“’Sus adto pa nang Lunes nagsugod estoryaha, unya nanawag dayun ko sa hospital kay off duty man ko, unya wala man, pataka ra man na sila’g report oy,” dugang asoy pa ni Candelario. (BANAT NEWS)