Duha ka coordinator sa masiao sikop

CEBU, Philippines - Duha ka tawo nga gikatahapang coordinator sa masiao nadakpan sa joint operation sa mga sakop sa Criminal Investigation Division Group (CIDG) 7 ug mga sakop sa kapolisan sa lungsod sa Liloan sa miaging buntag.

Ang nadakpan mao si Roberto Noval, hingkod nga taga sitio Looc, barangay Poblacion ug Edgar Sugarol, hingkod, nga taga sitio Suba, sa nahisgotang barangay nga pulos sakop sa dakbayan sa Danao.

Si PO1 Ronald Rusello sa Liloan Police Station nga nahinabi sa Banat News miingon nga si Noval gisilbihan sa kapolisan og search warrant (SW) nga giluwatan sa korte.

Human ikasilbi kang Noval ang SW gisakmit dayon sa mga otoridad ang 100 ka mga tally sheet nga gisuwatan na sa nagkadaiyang kombinasyon nga numero sa masiao, fax machine, calculator ug salapi nga balor og P8,236.5 ug uban pa.

Samtang si Sugarol kinsa nadakpan usab sa ilang balay nasakmitan usab og 59 ka mga tally sheet sa masiao, fax machine ug P100 nga salapi nga pulos sinsiyo ug uban pa.

Ang mga dinakpan kasamtangang gibalhog sa detention cell sa CIDG 7 ug giandam ang kaso nga isang-at batok kanila. – BANAT NEWS