CEBU, Philippines - Ang kasamtangang kapitan sa barangay Linao, dakbayan sa Talisay nga si Reynaldo Sedentario miduso og reklamo ngadto sa buhatan sa Comelec sa siyudad bahin sa iyang pasangil nga si city councilor Val Ylanan nanghakot og mga tawo.
Si Talisay City Election Officer Corazon Moran sa pakighinabi niini sa Banat News kagahapon mibutyag nga si Sedentario mianha sa iyang buhatan sa milabay’ng adlaw ug mipakita sa mga lista sa mga ngalan sa mga tawo nga giingong gihakot ni Ylanan ug giparehistro sa ilang barangay.
Apan gipasabot ni Moran nga milapas na ang adlaw sa pagduso ni Sedentario sa iyang petisyon hinungdan nga wala na silay mahimo niini.
Sa laing bahin, si Ylanan nga nahinabi sa mga tigbalita mibutyag nga ang nahisgutang mga tawo nga giingon ni Sedentario iyaha kining mga trabahante ug uban niini iyang mga paryente kinsa daan nang nagpuyo sa maong lugar sukad pa niadtong tuig 2000 nga ang tanan mikabat sa 300 ang gidaghanon.
Mikisikisi si Sedentario tungod kay ang lig-on niyang kaatbang karon mao si Ofelia, ang asawa ni Ylanan. – BANAT NEWS