Taxi driver gitulisa'g P1,300

CEBU, Philippines - Nawad-an sa P1,300 nga kinitaan sa pagpamasahero ang usa ka drayber sa taxi human kini tulisa sa duha ka armadong mga lalaki didto sa dalan A.C. Cortes, barangay Cambaro, dakbayan sa Mandaue sa miaging gabii.

Ang biktima mao si Wilson Superales, 33, minyo, nga taga sitio Tac-an, sa barangay Talamban, ning dakbayan sa Sugbo ug drayber sa RP Corominas taxi.

Si PO3 Gregorio Cabisarez sa Presinto 5 sa Mandaue City Police Office (MCPO) nga nahinabi sa Banat News miingon nga misakay gikan sa barangay Basak, dakbayan sa Lapulapu ang duha ka wala hiilhing mga lalaki ug nagpahatod sa dakbayan sa Mandaue.

Apan pag-abot nila sa dalan A.C. Cortes sa barangay Cambaro sa maong dakbayan kalit lang gitionan sa ilang armas de fuego ang tangkugo sa biktima uban sa pagdeklarar nga tulis. Walay nahimo ang biktima gawas sa pagtunol sa iyang P1,300 nga kinitaan sa pagpamasahero.

Unya human makatulis nanganaog dayon sa taxi ang mga tulisan ug mimandar pa kini nga dili pasumbongon sa kapolisan ang biktima.

Ug gimandaran pa ang drayber nga sa sunod nga higayon ipadako-dako ang ikahatag niining salapi ngadto sa mga tulisan kay nadiskontento sila sa ilang natulis gikan sa biktima.

Padayon pang gipangita sa kapolisan ang maong mga tulisan.  – BANAT NEWS