Sanchez ok sa amnestiya sa rebelde

CEBU, Philippines - Gisuportahan ni Vice Gov. Gregorio Sanchez ang paghatag og amnestiya ni Presidente Benigno ”Noynoy” Aquino III kang Senador Antonio Trillanes ug uban pang mga sundalo nga sakop sa Magdalo group nga mialsa batok sa kanhi administrasyon ni Presidente Arroyo.

Matud pa ni Sanchez nga ang desisyon ni Presidente Aquino usa ka maayong lakang aron pagpatunhay sa maayong relasyon sa mga nagtinarong mga kasundalohan.

Si Sanchez miingon nga angayan lamang nga hatagan og kahigayonan si Trillanes ug mga kaubanan aron imatuod nila sa katawhan nga kaantigo sila mopailawom sa kagamhanan kun kini maghatag og kaayohan sa nasud. 

Matud pa sa bise gobernador nga dili siya motuo sa pagduda ni Senador Joker Arroyo nga ang maong amnestiya sa presidente makaingganyo sa ubang mga sundalo sa pag-alsa batok sa gobyerno kay mahimo ra man diay’ng pasayloon sila sa presidente.

Kini tungod kay nagtuo ang bise gobernador nga ang gihimo sa presidente naghatag og mensahe sa mga sundalo nga ang kagamhanan mohatag og hustisya ngadto sa mga sundalong mibulgar sa kahiwian sa dagkong mga opisyal sa militar.   – BANAT NEWS