Kandidato nagpabuto gidakop

CEBU, Philippines - Nadakpan sa kapulisan sa dakbayan sa Mandaue ang midagan sa pagka-barangay kagawad sa umaabot eleksyon sa barangay Cambinucot sa dakbayan sa Sugbu human kini magpabuto sa iyang armas sa pundok sa mga batan-on sa miaging alas-10 sa gabii diha sa barangay Taboc sa dakbayan sa Mandaue.

Ang natanggong sa karsel sa kapolisan human nakuhaan og .45 nga kalibre sa armas nga dunay buhing mga bala sulod sa magazine mao si Edmund Garces ,32, taga Cambinucot ning dakbayan apan adunay balay sa Palm Hills Subdivsion sa barangay Tabok sa dakbayan sa Mandaue kinsa giingong gikan pa nga nangampanya apan mipauli kini og sayo tungod sa ulan sa miaging gabii.

Si Garces gidakop sa Investigation Detection and Management Bureau (IDMB) Mandaue City Police Office (MCPO) pinangulohan ni Chief Inspector Oscar Monteroyo ug giabagan usab ni Tabok barangay Kapitan Dario Tariman.

Si PO2 Raniel Cartin sa IDMB miingon nga sa imbestigasyon nga gihimo nila ni Monteroyo nalabyan ni Garces ang grupo nila ni Jovanne Babon, 27, nga nag-inom sa daplin sa karsada samtang nagselebrar sa ilang kadaugan sa liga sa basketball.

Matud pa ni Cartin nga diriyot maigo ang grupo sa sakyanan maong sa kakurat nila ilahang gisabligan og tubig ang sakyanan ni Garces apan nasuko ang naulahi ug mikanaog nga nakaingon sa ilang panaglalis ug misangpot sa pagpanion og armas ni Garces ngadto sa mga batan-on. Tungod sa kahadlok giingong nanagan ang grupo apan gipabuthan kini ni Garces ug daling mipauli sa ilang panimalay sa Palm Hills.

Hinuon ang mga batan-on nakatawag na og polis ug nag-abot si Garces ug grupo ni Monteroyo uban ni Kapitan Tariman hinungdan sa pagkadakop niini tungod sa pagdala sa maong armas.

Si North district election officer sa Comelec nga si Marchel Sarno mitataw nga dili mahimong pugngan nila si Garces sa iyang pagpapili isip kagawad sa Cambinucot hangtud nga di kini makombikto.

Si Garces gikatakdang pasakaan og kaso bisan paman kun dunay lisensya ang iyahang .45 nga armas kay nakalapas siya sa Comelec gun ban nga walay gitugotan ni bisan kinsa nga makadala-dala og armas gawas sa ilang pinuy-anan.   – BANAT NEWS