Kabanay sa plane crash victims nakadawat na

CEBU, Philippines - Pamilya sa tulo ka mga retiradong sakop sa Philippine Air Force nga nakalas sa trahedya sa nasud sa Afghanistan nakadawat na sa gidangatan sa ilang mga mahal sa kinabuhi human mahagsa ang abyon niini sa milabay’ng adlaw.

Giingong gumikan sa panginahanglan sa ilang mga pamilya maoy nakaaghat sa tulo ka mga kanhi sundalo sa PAF nga moretiro og sayo sa serbisyo aron manimpalad ngadto sa gawas sa nasud.

Matud pa ni Consorcia “Conching” Castillo, ang kapikas sa retiradong si 2Lt. Bernardo Castillo, 47, ug kanhi sakop sa 220 Airlift Wing sa Mactan Benito Ebuen Air Base (MBEAB) usa ka flight mechanic si Bernardo.

Miretiro kini niadtong tuig 2008 human sa 26 ka tuig nga pagserbisyo nangita og laing panginabuhian alang sa pamilya tungod kay aduna kini upat ka mga anak kansang kamaguwangan nag-edad pa og 20-anyos.

Matud pa sa ginang nga mibiya ang iyang bana niadtong Oktubre 11 lamang pangadto sa nasud sa Uganda, Africa alang sa laing hugna sa unom ka bulan niining kontrata sa Transafrik (ang kompaniya sa abyon nga nahagsa) apan wala sila magdahom nga mao na kini ang katapusang adlaw sa ilang panagkita.

Sa wala pa mobiya si Castillo gikatahong kini mitugon kaniya nga atimanon ang ilang mga anak niini samtang atua siya sa layong dapit.

Samtang ang retiradong si Technical Sgt. Wilo Elbanbuena, 45, nga lakip sa nakalas naglaraw untang mapa-bendisyunan ang iyang napalit nga bag-ong pinuy-anan diha sa Golden Meadows Subdivision, sa barangay Gabi lungsod sa Cordova.

Matud pa ni Roy Elbanbuena ang ig-agaw ni Elbanbuena, miretiro ang iyang ig-agaw niadtong tuig 2006 human sa 19 ka tuig nga pagserbisyo sa 220th AW sa PAF diha sa MBEAB.

Sumala pa niini dako og natabang sa pamilya niini ang pagpanarbaho niini sa gawas sa nasud ug usa na niini ang panimalay nga iyang napalit diha sa maong subdivision nga wala niini makuha dihang nagserbisyo pa kini sa gobiyerno.

Si Elbanbuena nga adunay tulo ka mga anak kansang kamaguwangan nag-edad pa og 18-anyos nagplano untang sa iyang pagbalik karong Disyembre ning tuiga mapabendisyonan na ang ilang bag-ong panimalay.

Samtang si Nela Padura, ang kapikas sa retiradong si 2Lt. Eduardo Padura, 55, usa ka avionics specialist sa Transafrik nga lakip sa nakalas mipadayag nga niadtong milabay’ng Oktubre 3 ning tuiga pa lang kini milarga balik ngadto sa Uganda alang unta sa laing unom ka bulan nga kontrata niini.

Si Padura adunay upat ka mga anak diin usa niini kasamtangang nagserbisyo gihapon sa PAF nga si AW1C Zyza Padura.

Matud pa ni Padura dili man unta mokuyog ang iyang bana sa maong flight apan gumikan sa pagsigurong maayo ba ang kundisyon sa maong abyon misuway kini og uban sa maong biyahe susama sa iyang naandang buhaton sa ubang abyon sa Transafrik aron ma-monitor ang kundisyon sa mga abyon.

Ang mga anak ni Padura nga nahinabi sa Banat News lakip na ang ubang mga kabanay ug asawa sa mga nakalas mibutyag nga ilaha nang nadawat ang tanan.

Nanghinaot ang pamilya sa mga nakalas nga madali nga mabalik dinhi sa nasud ang ilang mga patay’ng lawas ug matabangan sila sa kompaniyang ilang gialagaran. – BANAT NEWS