Suspek nangalyas nasakpan

CEBU, Philippines - Suspek sa pagpamusil sa duha ka mga batan-ong lalaki niadtong Miyerkules sa kaadlawon diha sa gawas sa usa ka diskohan sa dalan Juana Osmeña sa barangay Kamputhaw mao say suspek sa pagpanulis ug pagpatay sa usa ka kusinero pipila na ka bulan ang nakalabay.

Una niini, si Alexander Peñas Bacus, 26, taga Campo 2, Talisay City nadakpan ug gipasakaan og kasong frustrated homicide ug illegal possession of firearms and ammunitions ug kalapasan sa Comelec gun ban.

Kini human siya madakpi ug nakuhaan og caliber .22 deringer nga paltik revolver ug mga buhing bala tungod sa pagpusil nila ni Kervin Arsenal, 18, taga Hipodromo ug Edbert Tampos, 20, niadtong Miyerkules diha sa barangay Kamputhaw.

 Apan nakamay-ong si Chief Insp. Michael Anthony Bastes, hepe sa Fuente Police nga si Alexander nangalyas lamang tungod kay ang tinuod niini nga pangalan mao si Fritz Bacus Alferez nga taga sitio Kawayan barangay Sambag 2.

Si Alferez nag-atubang og kasong robbery with homicide ug robbery with physical injuries tungod sa pagtulis sa magsuong Vedasto Corsega ug Herbert Corsega niadtong kaadlawon sa Septiyembre 15, 2009 diha sa Arlington Pond sa barangay Sta. Cruz ning siyudad. Patay si Vedasto sa maong hitabo.

Si Alferez nga nahinabi sa Banat News miangkon nga siya ang nagpusil sa magsuong Corsega human kini nagdumili pagtugyan sa ilang cellphone apan wala siya magdahom nga iyahang mapatay ang usa.

Matud pa niya nga didto siya magtago-tago sa iyang mga paryente sa Danao apan niadto lang Martes sa gabii siya mibalik dinhi sa dakbayan apan nakapusil hinuon siya sa duha ka mga batan-on.  – BANAT NEWS