'Namusil' sa checkpoint napatay

CEBU, Philippines - Usa ka lalaking giingong armado ug misuway og likay sa gibutang nga checkpoint sa kapolisan ang napusilan human gikatahong nakigpinusilay sa mga migukod nga mga polis niadtong milabay’ng gabii diha sa sitio Catingtingon barangay Maricaban sa lungsod sa Sta. Fe isla sa Bantayan.

Ang napatay sa kapolisan mao si Edgar Jomola, molupyo sa sitio Matiamban, barangay Okoy sa maong lungsod samtang ang nakapusil kaniya mao si PO3 Juanito Yunting, 49, sa Sta. Fe Police station.

Matud ni Insp. Jaime Seloria Tolentino, hepe sa Sta. Fe Police dihang nahinabi sa Banat News siya uban sa iyang mga sakop apil na ni PO3 Yunting nagpahigayon og checkpoint sugod sa alas 7:00 sa gabii niadtong higayuna sa maong lugar nunot sa paghingusog nila pagpatuman sa Comelec gun ban tungod sa nagsingabot nga barangay election.

Sumala pa niya kalit miabot ang motorsiklong kolor puwa nga dunay plaka nga OV-7850 nga gimaneho sa usa ka Jesus Montebon Tuñacao, 38, ug angkas niini si Jomola nga naghukas og sinina ug nagluklok og armas sa iyang hawak.

Matud ni Insp. Tolentino nasigpatan nila ang puloan sa maong armas diha sa hawak ni Jomola maong ilaha kini dayong gipara apan dihang giduol na ni PO3 Yunting kinsa nag-iwag og flashlight niadtong tungura ilaha kining gimandoan sa pag-isa sa iyang mga kamot.

Apan kalit lang giingong giibot ni Jomola ang armas ug dayong pusil sa mga polis. Si Yunting kinsa nag-iwag sa flashlight ug nakakita sa gibuhat ni Jomola daling nakahupo ug mibawos og pusil.

Si Jomola naigo diha sa ibabaw nga bahin sa tuong dughan ug nahagba nga nagkupot pa sa iyang armas.

Gidali unta dayun pagdala sa mga polis ang biktima sa Bantayan District Hospital apan gideklarar kini sa mga doktor nga dead on arrival samtang nakuha sa mga polis ang kalibre .357 rebolber ni Jomola nga aduna pay upat ka buhing bala ug usa ka kabhang sulod sa tambor niini. Matud ni Tolentino kasamtangan niyang gikustodiya si PO3 Yunting ug gikuhaan sa armas aron ipaubos sa ballistic exam kauban ang armas ni Jomola diha sa PNP Regional Crime Laboratory. – BANAT NEWS