Inasal festival sa Talisay karon

CEBU, Philippines - Gilauman nga labing bongga ang pagsaulog sa Halad Inasal Festival sa dakbayan sa Talisay niining adlawa Oktubre 15, 2010.

Si Talisay City administrator Richel Bacaltos sa pakighinabi sa Banat News kagahapon nagkanayon nga sama sa milabay’ng tuig adunay contest karon sa mga contingent nga mosalmot sa kasaulogan.

Ang misalmot sa contest niining tuiga mao ang Pooc National High School, Asian College of Technology, Sisters of Mary, Cebu Saint Therese School of Learning ug Saint Scholastica’s Academy.

Matud ni Bacaltos nga gawas sa contingent contest dunay float contest usab ug ang mga makadaog sa mga bangga makadawat og ganting salapi ug tropeyo.

Si SPO4 Henry Obiso, hepe sa Traffic Division sa siyudad nagkanayon nga ang parada sa mga contestant sugdan sa ala 1:00 sa hapon gikan sa city hall paingon ngadto sa South Coastal Road habig sa barangay Lawaan I, barangay San Isidro, lahos sa barangay Dumlog dayon sa Talisay City Central School sa barangay Poblacion diin adto ipahigayon ang dance showdown ug ang maong mga dapit sirad-an sa trapiko. – BANAT NEWS