Tambal wa overpraysi - Sepulveda

CEBU, Philippines - Kusganong gipanghimakak ni Capitol Consultant on Information Rory Jon Sepulveda ang laing pasangil ni Vice Governor Gregorio Sanchez nga matud pa gi-overprice sa Kapitolyo ang napalit niining Paracetamol, usa ka tambal sa hilanat.

Sa sayo pa si Sanchez mitumbok nga ang usa ka 500 miligram nga tableta sa Paracetamol gipalit sa Kapitolyo sa tag P17.

Apan si Sepulveda nagkanayon nga base sa record gikan sa Provincial Accounting Office ,ang kantidad sa usa ka tabletang Paracetamol tag P.35 ug dili P17.

Sigun pa ni Sepulveda nga basin nasayop lang si Sanchez sa pagtan-aw, kay duha ra ba ka klase ang Paracetamol, adunay tableta ug aduna usay syrup. Ang syrup maoy tag P17 ang botelya , samtang ang sa prisyo sa tableta nga Paracetamol tag P.35.

Matud pa ni Sepulveda nga angayan nga klarohon pag-ayo sa bise gobernador ang mga pasangil pinaagi sa pagbaton og dukomento aron may igo siyang katarungan sa paglamba og pasangil batok sa gobernador.  – BANAT NEWS