CEBU, Philippines - Tulo ka tulisang nadakpan diin duha kanila nangapusilan sa usa ka off-duty nga polis gipasanginlang pulos adunay criminal record sa lalawigan sa Bohol sumala pa ni Supt. Pablo Labra sa Cebu City Police Office (CCPO).
Si Labra ang deputy director for operations sa CCPO nagkanayon nga wala nila isalikway ang posibilidad nga daghan pang kauban ang grupo apan base sa ilang nakuhang impormasyon sa Bohol Provincial Police Office (BPPO) dunay criminal records didto ang mga suspetsado.
Kahinumduman nga ang off-duty nga si PO3 Osorio Ramiso nakigpinusilay nila ni Shyrill Lambo Ostea nga taga Baclayon, Bohol ug Alberto Aniedez Torregosa, 29, taga Magtangtang, Danao, Bohol human nila gitulis ang tagdumala sa ‘Pulis Kapit-Bisig Lending Firm nga sila si Maridel Oblema ug Josephine Sanchez pulos nag-abang sa Chua boarding house.
Atol sa follow-up operation sa kapulisan nasikop si John Remoreras Nuez ,22, taga San Miguel Bohol kinsa maoy gitumbok nga look-out.
Sumala pa ni Labra, sila si Torregosa, Ostea ug Nuez adunay mga kasong giatubang sa Bohol ug si Torregosa apil sa wanted list sa maong lalawigan.
Ilaha usab nasayran nga si Nuez nangalyas og laing pangalan dinhi sa dakbayan sanglit ang tinuod nga pangalan niini didto sa Bohol mao si Joel Torregosa Nuez nga naay warrant of arrest sa Bohol.
Si Nuez giingong ig-agaw ni Meloy Garcia nga nabilanggo na karun sa Bohol maoy giilang lider sa Garcia Robbery Group nga nakapanulis na dinhi sa dakbayan duha ka tuig ang nakalabay.
Sila si Ostea ug Torregosa padayong gi-obserbahan sa mga doktor sa Cebu City Medical Center ug hugot nga gibantayan. Samtang nakagawas na sa tambalanan ang napagang si Clyde Guerrero kinsa naigo sa iyang batiis.
Samtang irekomendar ni Mayor Michael Rama si PO3 Osorio Ramiso Jr. nga mahatagan og promosyon ug dili salapi isip reward gumikan sa bayanihon niining nahimo.
Si Ramiso nadestino sa Police Community Relations sa Police Regional Office-7 gidayeg sa iyang gibuhat. – BANAT NEWS