Gisanggot sa bayaw

CEBU, Philippines - Patay nang napalgan sa kasagbotan ang usa ka 55-anyos nga lalaki human kini gisanggot sa iyang bayaw human sa panaglalis niadtong Domingo sa hapon didto sa barangay Tigbao sa lungsod sa Badian.

Si Heremias Maribao, 55, molupyo sa nahisgutang lugar napalgang patay niadtong Martes sa buntag sa kasagbotan gibana-banang 500 metros ang distansya gikan sa panimalay niini.

Samtang arestado ang suspek nga si Tereso Yunting, 38, nga bayaw sa biktima kinsa napusilan sa iyang dapidapi dihang misuway og dagan pagkakita sa nangabot nga mga polis.

Sumala pa sa kapolisan nakaangkon og daghang samad sa kalawasan nga lakip na sa liog agi sa usa ka gituohang sanggot ang biktima nga nakaingon sa hinanali niining kamatayon.

Si Chief Insp. Tim Alam, hepe sa Badian Police station uban sa mga sakop milusad dayon og hot pursuit operation batok kang Yunting human nila mahibaw-ing gikan sa usa sa mga uwahing nakauban sa biktima ug sa suspek nga nag-inom pa sila niadtong Domingo sa hapon.

Matud pa ni PO2 Arnel Tandoy sa interbyu sa sibyaanang DyDD nga atol sa panag-inom niadtong Domingo mitumaw ang panaglalis sa biktima ug sa suspek kay matud pa nasuko ang suspek nga kanunay kulatahon sa biktima ang iyang igsuong babaye (asawa sa biktima).

Gituohang wala makaagwanta ang suspek ug mikuha kini’g sanggot ug gitigbas sa makadaghang higayon ang biktima.

Ang suspek niadtong Martes sa buntag didto nakit-an sa balay sa iyang ig-agaw apan pagkakita niini sa mga pulis kalit kining midagan hinungdan nga gipusil ug naigo sa iyang dapidapi ug gidala sa Badian District Hospital. – BANAT NEWS