Dia del Galleon miabot na

CEBU, Philippines - Miabot na ang Galleon Andalucia diha sa adwana (Pier Uno) alang sa selebrasyon sa Dia Del Galleon agi og paghinumdum sa Galleon Trade tali sa Pilipinas ug Mexico nga gihimo sa nasud sa Espanya.

Ang maong barko replica sa 17-siglo nga barkong ginama sa kahoy ug layag nga milawig sa mga rota kaniadto sa Galleon Trade. Gisugat kagahapon ang crew sa maong barko nila ni Gob. Gwendolyn Garcia ug Cebu City Mayor Michael Rama.

Si Garcia mitumbok nga ang mga tripulante sa maong galyon giingong mibutyag nga susama sila og gibati atol sa ilang pagdunggo sa gibati kaniadto sa labing unang taga Uropa nga si Ferdinand Magellan dihang ilang nadiskubrehan ang Sugbu. Si Magellan midunggo diha sa isla sa Mactan.

Ang katuyoan sa Dia del Galleon mao ang pagsubay sa rota sa mga galyon niadtong ika-17 siglo ug ang Pilipinas maoy usa sa mga rota niini nga nagkonektar sa ubang mga kanasuran sa Amerika ug sa Uropa. Adunay mga kalihukan nga himuon may labot sa kasaysayan, kultura, ug uban pa inabagan ang mga kalihukan sa UNESCO International Theater Institute, ug National Commission for Culture and the Arts (NCCA) ug ubang ahensya sa gobiyerno.  – BANAT NEWS