Mahuyang gipusil namatay

CEBU, Philippines - Patay ang usa ka giingong mahuyang human kini pusila sa wala hiilhing mga kriminal didto sa center island sa South Road Properties (SRP) habig sa barangay Cansojong, dakbayan sa Talisay kagahapon sa kaadlawon.

Ang biktima giila lang nila ni PO2 Jundave David ug PO2 Henry Mata sa ngalan nga “Lanie” usa ka giingong mahuyang kinsa nakaangkon og usa ka samad pinusilan sa iyang ulo nga maoy hinungdan sa iyang kamatayon.

Si Lanie gihulagway nga taas ug kulong ang buhok, nagsul-ob og maong nga karsones ug itom nga blouse ug gibana-banang nagpanuigon sa 30-anyos.

Base sa pasiunang imbestigasyon sa mga polis nga ang mga nagpuyo sa maong lugar mitug-an nga nakadungog sila og buto sa armas hinungdan nga ila kining gilili.

Maoy ilang nakita ang upat ka mga lalaki nga gibana-banang nagpanuigon og tag 20-anyos, usa kanila nagsul-ob og orange nga t-shirt nagdaling nanagan paingon ngadto sa sudlonong lugar sa sitio Ebacan, Cansojong.

Padayon pang gipangita sa kapolisan ang mga kriminal.  – BANAT NEWS