Awto sa German miharos 2 sakyanan

CEBU, Philippines - Tulo ka tawo ang naangol human gidaro sa usa ka awto nga gimaneho sa usa ka German ang usa ka jeep pasaheroan ug motorsiklo una kini mopilit sa poste sa kuryente pasado alas-11 sa miaging gabii diha sa eskina sa Silver Hills sa barangay Talamban ning dakbayan.

Si PO2 Edgardo Becoy sa traffic division nga nahinabi sa Banat News sa telepono miila sa drayber sa awto nga Mitsubishi Evolution nga si Geoffrey Robert Thomas, taga Paradise Village sa barangay Banilad.

Samtang ang naangol mao ang drayber sa pasaheroan nga si Juven Andales taga Univille, Banilad ug ang asawa ni Thomas nga si Anilou Thomas samtang ang ikatulo nga naangol mao ang pasahero sa jeepney nga na-blackeye apan wala na makuha ang pangalan sa kapolisan.

Si Becoy nagkanayon nga hinulman lang ni Thomas sa iyang higala ang maong awto nga iyang gikainom sa iyang wine shop.

Matud pa ni Becoy nga paingon sa Country Mall si Thomas sakay ang iyang asawa ug laing kauban dihang pag-abot sa nahitaboan kalit lang mi-counter flow si Thomas hinungdan iyang naigo ang gikasugat nga jeepney ni Andales human mibaliwliw ang sakyanan sa langyaw.

Gumikan sa kakusog sa impact nalahos kini sa usa ka balay dayon nadaro ang giparking nga motorsiklo nga gipanag-iya ni Ernesto Monterola daplin sa karsada ug nahandos kini ngadto sa usa ka poste.

Si Monterola miparking sa iyang motorsiklo aron mopasilong tungod sa kakusog sa uwan niadtong tungura.

Si Becoy nagtuong ang kusog sa uwan maoy nakaingon sa maong aksidente ilabi na nga mi-counter flow kini sa dalan base sa pamahayag sa mga testigos.

Wala pa makahinabi sa kapolisan ang maong langyaw kay nag-atiman pa kini sa iyang asawang anaa karun sa tambalanan.  – BANAT NEWS