CEBU, Philippines - Napakyas ang duha ka gipasanginlang tulisan human usa kanila ang napusilan sa usa ka off-duty nga polis nga nagpuyo sa giabangang balay sa duha ka babayeng tigpatanto og kwarta nga ilaha untang biktimahon diha sa dalan Uytengsu sa barangay Sambag 2 ning dakbayan sa miaging pasado alas 7 sa gabii.
Nakigpinusilay kanila mao si PO3 Osorio Ramiso Jr. kinsa nadestino sa Police Community Relations sa Police Regional Office-7 hinungdan sa pagkaangol sa mga suspek nga sila si Shyrill Lambo Ostea, kinsa nag-abang og boarding house sa maong lugar ug lumad nga taga Guiwanon Baclayon, Bohol ug Alberto Aniedez Torregosa ,29, taga Magtangtang, Danao Bohol. Si Ramiso kinsa nag-abang og lawak sa tupad nga boarding house nakabantay sa pagpanulis dihang gipahibawo sa mga tawo ang nahitabo.
Hinungdan nga sa pagresponde niini nahitabo ang pinusilay tali niya ug nila ni Torregosa ug Ostea apan nangaigo ang mga suspek.
Atol sa pinusilay napagan ang usa ka sibilyan nga diha sa dapit ug giila sa kapulisan nga si Clyde Guerrero nga taga Asuncion St,. sa barangay Sambag 2 kinsa natapsingan sa iyang walang batiis human naigo sa pinusilay ug gidala sa Chung Hua Hospital kagahapon sa hapon. Bisan tuod og samaron na sila si Torregosa ug Ostea kinsa nangaigo sa dughan ug kilid nakasakay gihapon sa ilang motorsiklo apan nangalamba ug nagkatag na sa karsada ang binandol nga kwarta lakip na ang driver’s license niini nga ilang nakuha sa ‘Pulis Kapit-Bisig’ nga usa ka lending firm nga gidumala nila ni Maridel Oblema ug Josephine Sanchez pulos taga San Juan Metro Manila ug nag-abang sa Chua Boarding house.
Human niini nag-iyahay ang duha og para og taxi diin unang gipara ug gitionan og pusil ang driver nga si Emidio Panginajog sa Macmac Taxi hinungdan nga naglumbaanay og ambak ang mga pasahero niini lakip na si Panginajog.
Si Ostea mibalhin og sakay sa laing taxi nga gimaneho ni Rogelio Queque sa Earland Taxi ug nagpahatud ngadto sa C. Padilla diin gikuha niya ang iyang higala ug nagpahatud ngadto sa Miller Hospital.
Matud ni Queque wala na siyay nahimo human siya gitionan og armas. Samtang ang laing samaron nga si Torregosa sa Cebu City Medical Center na masakpi.
Matud pa sa mga biktima nga kalit silang gisulod sa duha ka suspetsado ug gipangtionan og .45 nga kalibre sa armas dayong kuha sa kuwarta ingon man sa ilang relo ug singsing.
Human niini daling nanggawas ang mga tulisan apan si Ramiso daling miresponde ug nahitabo ang pinusilay.
Sa gihimong follow-up operation ni Chief Insp. George Ylanan sa Investigation and Detective Management Branch (IDMB) inabagan ni Chief Insp. Michael Anthony Bastes, hepe sa Fuente Police station, ug Sr. Insp. Bonifacio Garciano nadakpan nila kagahapon sa ala una na sa kaadlawon ang lookout nga si John Remoreras Nuez, 22, nga taga San Miguel, Bohol kinsa nag-abang usab sa maong boarding house.
Si Nuez nasuta nga ig-agaw sa notadong tulisan nga si Meloy Garcia nga nangigo dinhi sa dakbayan duha ka tuig na ang nakalabay.
Nakuha nga mga ebidensya mao ang duha ka .38 revolver, nga dunay siyam ka buhing bala, salapi nga P113,100, tulo ka relo ug usa ka singsing, duha ka pitaka, cellphone diha sa posesyon sa mga suspek. – BANAT NEWS