CEBU, Philippines - Gumikan sa kuwarta ug sa balatian sa lawas, duha ka tawo ang nagpakamatay sa nagkalainlaing lugar ning dakbayan sa Sugbo ug sa dakbayan sa Danao, sa miaging adlaw.
Sila mao si Ricardo Timanda Cagal, 53, minyo, nga nagpuyo sa sitio Bangkal, barangay Guba, taga Misamis Occidental nga mibakasyon nganhi sa dakbayan sa Sugbo, ug si Maxima Conde, 55, minyo usab nga taga sitio Pag-utlan, barangay Maslog, dakbayan sa Danao.
Si Cagal kinsa lumad nga taga Purok 3, Panaon, Misamis Occidental napalgan sa iyang igsoon nga nagyaka sulod sa pansayan nga patay na.
Si SPO3 Rey Cuyos sa Homicide Section sa kapolisan ning dakbayan sa Sugbo nakasaksi nga ang liston sa sapatos nga gisumpay-sumpay maoy gihikot sa liog sa namatay samtang ang pikas tumoy niini gigaid usab sa sagbayan sa pansayan.
Si Antonio Cagal, manghod sa naghikog mitug-an sa kapolisan nga naguol ang iyang igsoon kay walay ika plete pauli ngadto sa Misamis Occidental.
Si Cuyos dihang nahinabi sa Banat News mitug-an nga si Ricardo mibakasyon dinhi sa Sugbo niadtong Septembre 24, 2010, unya buot na unta kining mopauli apan walay kuwarta.
Gani si Antonio mitug-an sa kapolisan nga nanghuwam siya og kuwarta sa ilang ig-agaw didto sa sitio Pit-os, barangay Talamban apan wala usab kini makahuwam ug pagbalik niya, patay na si Ricardo.
Gimando sa kapolisan nga ipa-autopsy ang lawas sa namatay aron masuta kun wala bay foul play ang kamatayon niini.
Samtang sa laing bahin si Conde nga taga Pag-utlan napalgan sa iyang pamilya ang lawas patay niini nga nagbitay sulod sa ilang balay nga migamit og habol nga gihikot sa iyang liog ug gigaid usab ang pikas tumoy sa sagbayan sa ilang balay.
Si SPO1 Jose Salingua sa Danao Police Station mibutyag sa Banat News nga gisuginlan sila sa pamilya ni Conde nga matud pa dugay na kining nag-antos sa nervous breakdown nga gituohan nilang maoy hinungdan sa pagpakamatay niini.
Hinuon gimandoan gihapon sa kapolisan ang iyang pamilya nga ipa-autopsy ang lawas patay ni Conde aron mapiho nga walay foul play ang iyang kamatayon. - BANAT NEWS