CEBU, Philippines - Patay nang nakit-an nga naglutaw sa dagat ang usa ka lalaki nga giingong dunay deperensiya sa panghuna-huna sa kadagatan sa barangay Talisay sa lungsod sa Sta. Fe isla sa Bantayan niadtong Lunes sa alas 5:00 sa buntag.
Ang nakit-ang patay mao si Polito Alarde Almodiel, molupyo sa nahisgutang lugar ug dunay deperensiya sa pangisip.
Matud pa ni PO3 Juanito Yunting sa Sta. Fe Police station dihang nahinabi sa Banat News base sa imbestigasyon ang biktima unang nakit-an sa mga kaila ug silingan nga nag-inom ug nahubog nianang pagka Domingo sa hapon.
Pagkahuman niini nakit-an kining misakay og sakayan ug nagbugsay paingon sa lawod hangtud nga namatikdan sa mga kabanay nga wala na kini mopauli pa nianang pagkagabii.
Pagkabuntag nakit-an nalang kini sa mga mananagat nga naglutaw na sa dagat nga patay na hinungdan nga gi-report nila kini ngadto sa kapulisan.
Atol sa gihimong pakisusi sa municipal health officer nga si Dra. Rowena Manalili nasuta nga nalumos kini ug maoy hinungdan sa kamatayon niini ug gisalikway usab dayon ang posibilidad nga adunay foul play sa nahitabo. - BANAT NEWS