Duha piniriso sa CPDRC namatay

CEBU, Philippines - Duha ka mga piniriso sa Cebu Provincial Detention and Rehabilitation Center (CPDRC) ang namatay sa sakit niadto lamang adlaw nga Miyerkules, Oktubre 6 ning tuiga diha sa sulod sa bilanggoan sa probinsiya.

Ang Jail Warden sa CPDRC nga si Alger Commendador daling mipasabot nga dili tungod sa bun-og o ba kaha sa grabeng pagsayaw ang hinungdan sa kamatayon sa duha.

Siya nagkanayon nga ang kamatayon sa maong mga inmates mao ang ilang sakit nga gihambin tungod ra usab sa ilang katigulangon.

Ang acting record officer sa CPDRC nga si Clarito Egnora miila sa namatay mao sila si Francisco Epe, 55, taga Tambungan, San Remegio ug nag-atubang og kasong parricide.

Sigon pa ni Egnora nga si Epe nagsugpa og dugo tungod sa iyang sakit nga tuberculosis ug sakit sa kasingkasing sa wala pa kini makuyapi.

Dali untang gidala si Epe ngadto sa Vicente Sotto Memorial Medical Center apan gideklarar kini sa mga doktor nga dead on arrival.

Ang laing namatay giila ni Egnora nga si Felipe Vargas Sr. ,82, taga lungsod sa Dalaguete ug nag-atubang og kasong murder uban sa laing duha ka mga anak niini nga anaa gihapon sa CPDRC.

Sigon sa records, si Vargas nagmulo sa nagkadaiyang sakit sa lawas sa wala pa nakuyapi. Gidali usab kini og tabang sa resident doctor sa CPDRC apan nakabsan na gyud kini sa iyang kinabuhi.

Ang atake sa kasingkasing ug pneumonia maoy usa sa gitan-aw nga hinungdan sa hinanaling kamatayon ni Vargas.

Tungod sa maong hitabo, si Capitol Consultant on Peace and Order retired Col. Ceasar Veloso misugyot nga ibuwag ang mga masakitong piniriso aron matarong kini sa pag-atiman sa mga health personnel ug dili usab makatakboy sa ubang mga bilanggo. - BANAT NEWS