Ginang, 2 sakop nakuhaa'g armas

CEBU, Philippines - Mga nagkalain-laing mga armas ang naembargo samtang usa ka opisyal sa kapolisan ang diriyot madisgrasya dihang usa sa mga sakop sa biyuda nga maoy subject sa warrant kalit nga namusil ngadto sa mga polis.

Ang pagkasakmit sa maong mga armas nahitabo diha sa sitio Laray barangay San Roque, dakbayan sa Talisay kagahapon sa buntag diin usa ka Jovita “Jovie” Bacalso ang gidakop.

Si Bacalso maoy subject sa search warrant nga giluwatan ni Regional Trial Court (RTC) Judge Soliver Peras sa Branch 10 tungod sa paghupot og mga armas.

Samtang duha ka mga trabahador niini sa iyang woodcraft nga negosyo nga sila si Dolsino “Cino” Villasan Aton ug Rey Cabonillas Gakanay, 38, taga lungsod sa San Fernando kinsa nakaangkon og samad pinusilan sa walang paa.

Si Police Insp. Hugo Rio Ipong nga nahinabi sa Banat News kagahapon mibutyag nga miadto sila sa lugar aron mag-serve sa search warrant batok kang Bacalso apan dihang miabli siya sa pultahan sa ibabaw’ng bahin sa shop sa suspek nakurat nalang siya nga gitiunan siya og armas nga kalibre 38 rebolber ni Gakanay.

Tungod sa kakurat nakaambak si Ipong sa ubos dungan sa pagbuto sa maong armas hinungdan nga si PO3 Arnold Damasco kinsa nagsunod kang Ipong mibawos sa pagpabuto sa armas niini ug naigo sa tiil si Gakanay.

Ang suspetsado gidala sa mga polis ngadto sa Talisay City District Hospital apan tungod sa kahimtang niini gibalhin ngadto sa Vicente Sotto Memorial Medical Center.

Nakuha gikan nila ni Gakanay ug Aton ang usa ka .38 kalibre rebolber ug usa ka espadang dunay gitas-on nga 19.

Nakuha usab sa mga polis gikan sa balay ni Bacalso ang usa ka submachinegun nga may magazine ug upat ka buhing bala, usa ka kalibre .22 rebolber, usa ka kalibre .45 pistola nga dunay usa ka magazine ug laing duha ka reserbang magazine sa kalibre .45 nga pulos may sulod nga mga bala, duha ka wigs, usa ka puwang panyo, usa ka netbag nga stripes kolor yellow, blue ug puwa, usa ka camouflage green nga jacket, usa ka camouflage nga short ug usa ka camouflage nga kalo.

Si Supt. Henry Biñas nga nahinabi sa Banat News kagahapon mibutyag nga duna silay nadawat nga report kabahin sa giingong paghupot ni Bacalso og mga armas hinungdan nga ilaha kining gipanid-an sulod sa duha ka semana.

Si Bacalso nga nahinabi sa Banat News mihimakak nga adunay submachine gun sa kwarto sa iyang anak nga babaye. Hinuon giangkon ni Bacalso nga ang kalibre .22 nga rebolber iya sa namatay na niyang bana.

Kasong kalapasan sa illegal possession of firearms ang ipasaka batok kang Bacalso samtang sila si Gakanay ug Aton kasohan og direct assault with attempted homicide. -           BANAT NEWS