Bata-bata ni Joavan mi-plead not guilty atol sa arraignment

CEBU, Philippines - Mi-plead ‘not guilty’ ang giingong batabata sa kontrobersiyal nga si Joavan Fernandez nga sinagop ni Talisay City Mayor Socrates Fernandez kalabot sa kasong pag-drive og sakyanan nga walay lisensiya ug paghupot og ginadiling drugas.

Si Benedict Gabasa, usa ka job order worker sa siyudad sa Talisay, wala miangkon sa iyang kalapasan nga nahimo atol sa gipahigayong arraignment kagahapong adlawa sa sala ni Municipal Trial Court in Cities branch 1 Judge Monalila Tecson.

Si Gabasa giubanan sa iyang abogado nga si Atty. George Bragat nga mao usab ang abogado ni Joavan Fernandez sa mga kasong giatubang niini sa korte.

Nasayran nga ang kapolisan sa siyudad sa Sugbu nakadawat og alarma sa giingong pagpanion og armas ni Joavan Fernandez sa usa ka security guard sa usa ka mall sa may uptown area ning siyudad sa Sugbu niadtong nakalabay nga bulan.

Giingong misakay kini sa usa ka Toyota Revo nga may plate number SGH-541 nga iya sa gobiyerno.

Ang Pardo Police station gipangulohan sa police station chief nga si Insp. Edgar Nacario nakasakop sa maong sakyanan sa may Bulacao-Pardo siyudad sa Sugbu apan wala na si Joavan ug bugtong si Gabasa lamang ang nasakpan nga nagmaneho niini.

Apan nasuta nga wala kini lisensiya ug nakuhaan pa og nubain ampules ang maong sakyanan. Ang korte mitakda sa pre-trial sa maong kaso karong Nobiyembre 9 ning tuiga. (BANATNEWS)