Fishing boat nadasmagan sa barko

CEBU, Philippines - Usa ka fishingboat ang giingong nadasmagan sa usa ka cargo vessel niadtong tungang gabii diha sa kadagatan sa lungsod sa Compostela gibana-banang pito ka nautical miles gikan sa baybayon.

Sumala pa ni Capt. Anelito Gabisan, ang chief of staff sa Coast Guard District Station sa lalawigan sa pakighinabi sa Banat News nga nasalbar hinuon ang tanang crew ug opisyales sa FB Bachelor.

Naluwas ra hinuon ang tanang tripulante nga sila si boat captain Anecito Beduty, 53, ug boat engineer Arnie Aroma, 32, sumala pang Gabisan. Ang maong panagatan adunay 11.54 gross tons nga gibug-aton.

Samtang giila ni Lyn Khe, secretary ni Gabisan ang ubang naluwas nga mga tripulante mao sila si Joseph Balero,29, Junrey Morillo,26, Lucio Seballos,53, Edgardo Lom-oc,51, Dante Batiquin,36, Edgardo Lom-oc Jr., 20, Ranulfo Matiga, 50, Rodelio Villamonte, 38, Anatalio Barriga, 43.

Lakip sa naluwas mao sila si Joselito Arias, 43, Ricardo Barriga, 38, Jake Formentera, 29, Noel Aroma,45, Edwin Beduya, 30, J R Formentera, 53, Alfredo Albios, 58, Renel Albios, 34, ug Lorenzo Montalban, 58.

Matud pang Gabisan ang aksidente nahitabo samtang naghikot ang maong panagatan diha sa usa ka payaw sa lawod dihang kalit nga naligsan sa cargo vessel.

Wala hinganli ni Gabisan ang maong cargo vessel sanglit ilaha pa kining ikumpirmar sa ilang imbestigasyon, apan giingong nagkarga kini og 25,000 ka sakong semento gikan sa lungsod sa Naga padulong sa Semirara Island sa San Jose Buenavista sa rehiyon 6.

Giingong wala mohunong ang maong barko aron tabangan ang mga tripulante sa maong panagatan.

Apan sa report sa GMA News.Tv. gikan sa sibyaanang dzBB ang maong cargo vessel mao ang MV Andrea Princess, apan kumpirmahon pa kini sa Coast Guard.

Matud pa ni Gabisan nga usa ka Ely Daño nga taga barangay Looc dakbayan sa Danao ang mitawag sa ilang buhatan niadtong alas-12 pasado sa Domingo sa kaadlawon nga nagpahibalong ang panagatan niini nalunod.

Tungod niini daling mipadala og rescue vessel ang PCG ug swerteng walay dautang nahitabo sa mga tripulante sa maong panagatan sanglit dihang ilaha kining naabtan nangumpayot sila sa katig ug sa nahabiling parte sa maong panagatan nga wala malunod.

Ang mga mananagat nga nasalbar gihatud na sa barangay Looc sa Danao ug giingong luwas na sa peligro samtang giguyod na sa kaubang panagatan nga FB Almie padulong sa maong barangay.

Si Gabisan nagkanayon nga gipaabot pa nila ang pagpasaka og marine protest sa kapitan sa maong panagatan ug gikatakda usab nga imbestigahon ang nahitabong pagbangga sa maong cargo vessel ug ang tulubagon niini. (BANATNEWS)