CEBU, Philippines - Gibati’g kabalaka ingon man kahadlok si Guillermina Barrido human dunay nangita kaniya niadtong Domingo sa gabii diha sa provincial headquarters nga gidudahan niyang kauban sa grupo sa kontrobersyal nga sinagop ni Mayor Socrates Fernandez nga si Joavan.
Si Barrido mipahibawo niini kagahapon sa mga sakop sa media nga dunay nangita kaniyang susama og description sa kauban ni Joavan Fernandez nga ginganlan og Tata.
Apan matud ni Barrido nga nahuwasan siya sa kahadlok sa dihang nasayran niya nga ang tawo nga nangita kaniya usa diay ka “striker” sa provincial headquarters.
Hinuon si Barrido midugang nga iya dayon gipahibawo si Sr. Supt. Erson Digal nga dunay nangita kaniyang usa ka tawo sa miaging gabii aron mabutangan og dugang pulis gawas sa kampo sanglit kun Domingo sa gabii ang mga pulis nga mo-duty anaa lamang sa ilang tagsa-tagsa ka opisina ug mingaw kaayo ang palibot.
Si Barrido mitataw nga nahasol na siya’g maayo sa karun nga sitwasyon ilabi na kay iyang nakita nga ang mayor sige lang og dapig sa iyang sinagop bisan nalang unta sa pagpa-rehab niini.
Gisaway usab ni Barrido ang konseho sa siyudad sa Talisay nga walay nahimo batok sa sinagop sa mayor bisan nalang sa pagpasar og resolusyon aron awhagon ang mayor nga ipa-rehab si Joavan.
Gibutyag usab ni Barrido nga niadtong miaging semana nakadawat siya’g tawag gikan sa usa ka private number nga nagpailang gikan sa Office of the Senate ug iyang nadunggan ang tingog sa usa ka lalaki nga nagpakisayod unsa nay resulta sa imbestigasyon sa mga pulis labot sa iyang kaso batok kang Joavan.
Matud ni Barrido wala niya kini tubayi ang maong tawo ug iyang gipalong ang iyang cellphone human siya nagduda sa maong tawag.
Si Digal sa iyang bahin mipasalig nga luwas ra si Barrido sa provincial headquarters, mitambag hinuon siya kang Barrido nga mo-relax lang ug dili magbaton og kahadlok sanglit ang kaso niini batok kang Joavan trabaho na sa mga pulis.
Nanghinaot hinuon si Digal nga sunod higayon kun dunay reklamo si Barrido idiretso dayon kaniya ug dili dayon magpalaban ngadto sa mga sakop sa media. (BANATNEWS)