CEBU, Philippines - Miawhag si Board Member Thadeo Ouano sa mga nagpadagan sa tubig ug kuryente dinhi sa Sugbo sa pagtuman sa gimando sa balaod nga paghatag og 5 porsiyento nga diskuwento sa mga Senior Citizen.(SC)
Ang pag-awhag ni Ouano gipaagi sa usa ka resolusyon nga iyang gipangamahanan nga nag-awhag sa mga nagdumala sa water ug electric power utilities sa Sugbo sa pagtahod sa katungod sa mga SC pinasubay sa gipatuman nga balaod.
Matud pa ni Ouano nga ang gobyerno miila sa katungod sa mga SC nga nagmando sa paghatag og suporta sa kalisod nga gisagubang sa katigulangan ug pag-ila sa kagamhanan sa ilang natampo nga kalamboan sa atong katilingban.
Gitataw ni Ouano nga daghan na sa mga SC ang midangop sa iyang buhatan ug mipadangat sa ilang reklamo nga taliwala sa gipatuman nga expanded Senior Citizen Act of 2010 nga naghatag og singko porsiyento nga diskuwento sa ilang balayranan sa tubig ug elektrisidad, ang mga nagdumala sa mga namatigayon sa tubig og kuryente napakyas sa pagtuman sa balaod.
Hinuon maoy gitataw sa maong balaod nga kini ipatuman lamang ngadto sa mga balayranan nga dili molabaw sa 100 ka kilowatts per hour sa kuryente ug dili usab mokubos sa 30 porsiyento ka metro cubico nga konsumo sa tubig sa matag bulan.
Gipasabot ni Ouano sa iyang resolusyon nga ang kaayohan sa mga SC wala lamang imando sa Expanded Senior Citizen Act of 2010 kun dili anaa usab kini sa atong Batakang Balaod nga ang gobyerno angayan nga mohatag og unang pagtagad sa panginahanglan sa mga edaran nga molupyo dinhi sa nasud. (BANATNEWS)